Serbski muzej předstaji k prěnjemu razej zjawnje mjezystaw muzejoweje koncepcije. Tuta bě so zhromadnje z běrowom za koncepcije Dr. Ulrich Hermanns Ausstellung Medien Transfer GmbH z Münstera nadźěłała.
Jan Budar, direktor Załožby za serbski lud, dr. Ulrich Hermanns, wuwiwar koncepcije, a Christina Boguszowa, direktorka Serbskeho muzeja, předstaja koncepciju wustajenskich a wopytowarskich wobłukow noweho muzeja
foto: Serbski muzej
W prezency kaž tež přez livestream buchu muzealne rumnosće a rozdźělenje temow wustajeńcy wujasnjene. Při tym bu modularny natwar koncepcije předstajeny a někotre module bliže wopisane. Tak započina so wustajeńca tematisce ze serbskej rěču.
Dale rozłožichu so tež planowanja k modulej “narodna drasta” a tekstilneho depota. Dalša nowostka je modul “Serbske biografije”, kotrež budźe so bjezwuwzaćnje ze žiwjenskimi stawiznami wosebitych wosobinow zaběrać.
Dr. Hermanns wodźeše wobdźělnikow wirtuelnje we wizualizaciji po rumnosćach a kak so tute w přichodźe w jich funkciji wužiwaja. Po tym bě čas za prašenja. Zarjadowanje skónči so w čiłej diskusiji z tójšto idejemi a pokiwami publikuma. Wróćo zhladujo bu zarjadowanje jara derje přiwzate kaž tež wopytane. Serbski muzej je wjesoły nad zajimom a feedbackom připosłucharjow.
Mnoho zajimcow běchu wćipni na nowu koncepciju muzeja a běchu přeprošenju sćěhowali
foto: Serbski muzej
