Widźiš to na čerstwje nastajenej twarskej tafli – a tež wot horjeka: Nětko so něšto čini na Lawskim arealu. Hišće před oficialnym zarywom dnja 07. oktobra pak započinaja dźěła Krajoweho hamta za archeologiju : skupina pjeć do šěsć archeologowkow a archeologow přerywaja tu w předpolu poprawnych twarskich dźěłow někotre tydźenje dołho zemju.
Wobraz twarskeje kamery kónc septembra 2026: Wurywanja pokazuja hižo historiske murje.
Foto: Załožba za serbski lud.
A čehodla dokładnje?
Dokelž předpisuje Sakski zakoń za pomnikoškit, zo ma so přeco potom, hdyž so do zemje ryje, na přikład hdyž so dom z pincu twari, wotpowědna płonina na historiske zemske namakanki přepruwować. Tute bychu so hewak doskónčnje zhubili abo wobškodźili: Před twarskimi dźěłami je poslednja móžnosć, je wuchować abo z nich wědu wo stawiznach wokoliny zdobyć.
Što wočakuja archeologojo do namakankow?
Přez dokumenty wo stawiznach města wěmy, zo bě so na arealu hižo w času zažneho nowowěka a najskerje tež w srjedźowěku twariło abo čłowjek jón wužiwał, tak wopodstatnja to někotre probowe přepytowanja w połdra metrach hłubokosće. Z wěstosću su z tutoho časa namakanki wočakować. Nimo toho pak móhli so samo slědy słowjanskeho wobsydlenja abo hišće starše pokazać: Smy wćipni!