(zdźělenka Załožby za serbski lud z dnja 05.06.2023, lochce změnjena)
Za wubědźowanje wo realizaciju „Serbskeho foruma wědy na Lawskim arealu“ su so 108 architektowych běrowow hłownje z Němskeje ale tež z europskeho wukraja požadali. Přez wulosowanje zwěsćichu ze wšěch požadarjow 20 wobdźělnikow, z kotrychž 18 wubědźowanske dźěło zapoda.
Nadawk wubědźowanja bě, namakać za Lawski areal so hodźacu koncept za městno, na kotrymž Serbski institut a Serbski muzej w Budyšinje zhromadnje we wotewrjenej atmosferje wšitkim zajimcam serbsku kulturu zbližitej. Zdobom měli so z planowanjom wobstejace rumnostne naroki rjadować a za wobě instituciji načasne dźěłowe wuměnjenja a wustajenišća wutworić.
Model njewobtwarjeneho Lawskeho areala
foto: Załožba zs serbski lud
Wosebita ćeža při tym bě, zo měło so zhromadne skutkowanje na dwěmaj ze sobu njezwjazanymaj ležownosćomaj na Lawskim arealu zwoprawdźić. Tam wobstejace pomnikoškitne twarjenja mějachu so do planowanja zapřijeć.
Wuradźowanje mytowanskeje komisije
W dołhim wuradźowanju rozestaješe so mytowanska komisija ze zapodatymi naćiskami.
foto: Załožba zs serbski lud
Štwórtk, 01. junija 2023 schadźowaše so mytowanska komisija w Serbskim domje w Budyšinje pod nawodom prof. Axela Oestreicha, nazhoniteho architekta z Berlina. Nimo štyrjoch nazhonitych architektow słušachu k jury tež zastupjerjo załožby, Serbskeho instituta a Serbskeho muzeja. Zapodate buchu nimo projektowych skicow a planow tež mały 3D-model.
Komisija zaběraše so intensiwnje z 18 naćiskami, kiž su jara zajimawe a předpisane naroki jara wšelakorje rozrisaja. Po dołhim dnju móžachu so wšitcy wobdźěleni na dobyćerski naćisk dojednać, z kotrymž móža so wšitcy identifikować a kotryž funkcionelne žadanja serbskeju institucijow najlěpje spjelnja.
Dobyćerski naćisk architektow bogevischs buero z Mnichowa
grafika: bogevischs buero
Dźěło Mnichowskich architektow bogevischs buero přeswědči předewšěm tohodla, dokelž su w swojim naćisku pomnikoškitane twarjenje při Lawskich hrjebjach zdźerželi, přitwar zawrěje dźěru hač k zapadnej ležownostnej hranicy. Předwidźany twar zarjaduje so do měšćansko-twarskeho ramika, pokazuje so přiwšěm načasnje, cituje z wobłukojtym přechodom typiski motiw Budyskeho stareho města a twori tak po měnjenju jury hódnu adresu za Serbski forum wědy. Naćisk funguje nětko kaž tež, jeli měła so susodna ležownosć při Lawskich hrjebjach wobtwarić. Nutřkowna organizacija přeswědči jury runje tak kaž kwalita nastatych nutřkownych dworow. Jasna struktura podrysow hodźi so derje za wariabelne wustajenske koncepty muzeja.
2. městno wudoby sej naćisk běrowa Bez+Kock Architekten ze Stuttgarta
grafika: Bez+Kock Architekten
3. městno wudoby sej naćisk běrowa Schulz + Schulz Architekten z Lipska
grafika: Schulz + Schulz Architekten
Slědowace naćsiki běchu sej připóznaće wudobyli:
Holodeck architects z Wiena
grafika: Holodeck architects
VON M Gmbh ze Stuttgarta
grafika: VON M Gmbh
AFF Architekten z Berlina
grafika: AFF Architekten
Dobyćerski naćisk twori zakład za wšitke dalše planowanske kročele, kiž maja so hač do prěnjeho kwartala 2024 zakónčić. Po tym móže załožba doskónčnu próstwu wo spěchowanje zapodać. Wotwisnje wot přizwolenja planuje załožba tuchwilu z tym, zo móža z twarskimi dźěłami, rozrjadowanymi do dweju twarskeju wotrězkow, w druhim kwartalu 2025 započeć. Jeli so wšo radźi, je zaćah dweju institucijow kónc 2029 móžny. Twarske předewzaće je krajna naprawa Swobodneho stata Sakskeje, kotraž dóstanje za to 44,5 Mio EUR ze strukturnych srědkow po InvKG. Twarski knjez je Załožba za serbski lud.
Přinoški k temje w dalšich medijach:
- Bayern bauen in Bautzen (Radio Lausitz, 05.06.2023)
- Serbski forum wědy: 18 naćiskow a jedyn dobyćer (Serbske Nowiny, 09.06.2023)
- Dobyćerski naćisk Mnichowscy architekća zdźěłali (Serbske Nowiny, 05.06.2023)
- Dobyćerski naćisk „Serbski forum wědy na Lawskim arealu” předstajeny (MDR Serbski rozhłós, 06.06.2023)
- So soll das Sorbische Wissensforum in Bautzen aussehen (Sächsische Zeitung, 05.06.2023)
- So soll das Lauenareal künftig aussehen (Oberlausitzer Kurrier, 10.06.2023)