Za trajnu wustajeńcu w nowych rumnosćach Serbskeho muzeja ma so muzejowa koncepcija wuwić. Nadawk za to dóstanu nazhonići planowarjo wustajeńcow Dr. Ulrich Hermanns Ausstellung Medien Transfer GmbH z Münstera. Prěnja wuměna mjez planowarjemi a Serbskim muzejom so wotměje.
Za nowu trajnu wustajeńcu Serbskeho muzeja na Lawskim arealu ma so muzejowa koncepcija wuwiwać
foto: Serbski muzej Budyšin
Na prěnim zetkanju wobeju teamow dnja 13. nowembra 2023 so wšelake temy wobrěča, wosebje pak struktura dźěłoweho procesa a zakładne prašenja, kaž:
- Budźe wědomostna přirada nadźěłanje noweje trajneje wustajeńcy přewodźeć ?
- Kak daloko wotewri Serbski muzej w přichodźe drastowu zběrku za zjawnosć?
- Kotre techniske a klimatiske wuměnjenja dyrbja so za to wutworić?
- Po kotrym wašnju powědanja so trajna wustajeńca koncipuje – na objekty poćahowane, po temowych kompleksach abo chronologisce?
Po zetkanju móže muzejowy team na tutych prašenjach dale dźěłać.