Je to jónkrótny pokład, kiž so w magacinje Serbskeho kulturneho archiwa chowa – wona zběrka dokumentow a swědčenjow serbskich stawiznow a kulturneho tworjenja, kiž njeda so z pjenjezami zapłaćić. W regalach magacina namakamy listowanja a programowe łopjena serbskich towarstwow, manuskripty wědomostnych dźěłow kaž tež poezije, korespondency, rukopisne spěwniki, noty, zawostajenstwa fotografow, hudźbne nahrawanja a filmowy material.
Archiwalije w Serbskim kulturnym archiwje. Tu: Nabožny traktat, spisany wot Hanza Nepile (1766-1856), poddany bur ze Rowneho. Nimo tutych pietistiskich spisow je dźěl jeho awtobiografije zdźeržany, jedyn z mało tajkich dokumentow pisacych burow, a to samo w serbskej rěči. Tute rědke rukopisy su we wšelakich publikacijach wozjewjene a analyzowane kaž tež online přistupne.
foto: Serbski kulturny archiw
Dokumenty w Serbskim kulturnym archiwje njejsu zarjadniske pisma, ale historiske swědčenja kulturneho žiwjenja. Hač do dźensnišeho su wone přeco zaso inspiracija a zakład za nowe wědomostne předewzaća a kulturne projekty.
W čitarni archiwa a biblioteki zajimowani dźěłaja z tutym historiskim pismowstwom, kotrež na cyle wšelakore wašnje serbsku a regionalnu kulturu a stawizny posrědkuje.
W magacinje Serbskeho kulturneho archiwa na Dwórnišćowej w Budyšinje
foto: Serbski institut, Madlen Domašcyna (2026)
Archiwalije w Serbskim kulturnym archiwje. Tu: Dokumenty ze dźěławosće w lěće 1847 załoženeje Maćicy Serbskeje, towarstwa k spěchowanju wědomosće a ludoweho kubłanja. Jeje podłožki, hromadźene rukopisy kaž tež zawostajenstwa čłonow tworja spočatk archiwneho dźěła, kotrež hač do dźensnišeho traje.
foto: Serbski kulturny archiw
Z hromadźenjom njeje kónca. Sobudźěłaćerki a sobudźěłaćerjo archiwa wjesela so nad kóždym nowym přichadom. Druhdy su to jenož někotre listna, druhdy pak małotransporter połny kistow. Wone so wo to staraja, zo so material wěsće do archiwowych kartonkow składźe a w archiwnym magacinje zaměstni. Štož je hódne, dyrbi so trajnje wobchować – w magacinach pak wusko budźe. Wězo, zo so tež digitalizuje. Tak je wužiwanje jednoriše. Awtentiskosć pak jenož original sam wobchowa. Tola to je jenož jedna strona dźěła w archiwje. Dokumenty dyrbja so zmysłapołnje rjadować a preciznje wopisować, zo móhli so zjawnosći doporučić. Tute informacije so do datoweje banki zapisaja.
Pohladajće tola raz do wirtuelneje čitarnje Serbskeho kulturneho archiwa a Serbskeje centralneje biblioteki, w kotrejž su wobstatki archiwa a biblioteki wopisane.
Wotpis němsko – serbskeho słownika Prokopa Hančki (1782)
foto: Serbski kulturny archiw
